با راك فبالي معمري ننساك
رشيد العيرج – ابن شهيد حرب الصحراء المغربية
با راك فبالي معمري ننساك
مشيتي سربيس كاتدافع عل الصحرا
با راك فبالي ربي يكرم مثواك
قولي واش طرا
شوف ولدي انا قضيت حياتي عام ونصف فصحرا بلادي ويامات قلال حداك
ما عرفت فولادي اللي كلا منهم ولا اللي قرا
مت على بلادي حاربت عديان وطني وعداك.
تجرعت بتضحيتي الحلوة والمرّا
با راك فبالي معمري ننساك
مشيتي سربيس كاتدافع عل الصحرا
با راك فبالي ربي يكرم مثواك
قولي واش طرا
با راني عارفك أش كاتسوا ورمال الصحرا عارفاك
وغيابك جرح عميق عمرو ما يبرا
مولانا اللي يعرف تضحيتك هو مولاي ومولاك
هو عالم باللي صرا وجرا
والله وحدو يعلم حال الأم وولادك
فيهم اللي ما خدام ومن الأرامل اللي مازالا فالكرا
با راك فبالي معمري ننساك
مشيتي سربيس كاتدافع عل الصحرا
با راك فبالي ربي يكرم مثواك
قولي واش طرا
با واش عرفتي أش طرا فغيابك
ما نعاودليكش على حال الاولاد أ المرا !!
هاذ الناس نساووا ما قدَّمْتِ لبلادك
عيينا معاهم بالكتابة والهضرة
با بغيت نجلس فجنابك
ولا يجيبوا لي رفاتك نشمو نبرا
با بغيت نشوفك ولو مرة
عيينا من هاذ الغبن من هاذ القهرة
با راك فبالي معمري ننساك
مشيتي سربيس كاتدافع عل الصحرا
با راك فبالي ربي يكرم مثواك
قولي واش طرا
