ريحانة برس – ادريس صادق
اليوم الأحد 8 نونبر 2026، مع الثانية عشرة والنصف تقريباً، كنتلقى اتصال من الأخت ديالي، كتشتكي من ألم حاد فجهة الكلي. بلا تردد، خديت السيارة ووصلتها لمستعجلات مستشفى محمد السادس بالرباط.
ركنت السيارة قدّام المستعجلات، فالجهة اليسرى، بحالها بحال شي 40 سيارة أخرى. وكنأكد على واحد التفصيل مهم: علامة منع الوقوف كانت فالجهة اليمنى، أما الجهة اللي ركنت فيها فما كانت فيها حتى علامة ظاهرة كتمنع الوقوف.
دخلنا للمستشفى، والبال مشغول غير بالحالة الصحية ديال الأخت.
مع السادسة والربع تقريباً، خرجت باش ناخد السيارة… والمفاجأة: السيارة اختفات!
سولت أعوان الحراسة، حتى واحد ما عارف فين مشات!
هنا بدا العقل كيدور: واش داها الديباناج؟ علاش؟ واش تسرقات؟ واش ممكن وسط الروينة والخوف على الأخت نكون خليت الباب محلول؟
اتصلت بالشرطة على الرقم 19، عطاوني رقم آخر. عاودت الاتصال، وعطيتهم ترقيم السيارة، وبقيت كنتسنى حتى رجعوا اتصلوا بيا وأخبروني أن السيارة موجودة بالمحجز بحي النهضة!
40 دقيقة كاملة غير باش نعرف فين مشات سيارتي!
ودابا خاصني نلقى كيفاش نتنقل من السويسي حتى للحي الصناعي بحي النهضة باش نسترجعها!
لحسن الحظ، كنخدم فالرباط وعندي معارف. عيطت لواحد السيد، الله يجازيه بخير، جا هزني بسيارتو ووصلني للمحجز.
وصلت مع السابعة والربع تقريباً، ولكن المفاجآت ما سالاوش!
خاصني نتسنى حتى يجي رجل الأمن اللي جاب السيارة للمحجز، حيث السيد فمهمة خارج المحجز (en déplacement)!
وبالمناسبة كان خاصني نتواصل معاه في هاتف سائق سيارة الديباناج
ودابا الساعة 19:57، وأنا ما زلت هنا كنتسنى!
يعني نهار بدا بالخوف على صحة الأخت، سالى بتشريد المواطن بين المستعجلات والمحجز، وسط الانتظار والغموض وغياب المعلومة!
ولكن القضية ماشي غير سيارة ديالي، ولا مجرد مخالفة محتملة.
القضية هي: فين هو الحس الإنساني فتنزيل القانون؟ وفين هي الحكمة فممارسة السلطة؟
أولاً، السيارة كانت مركونة فجهة ما فيهاش علامة ظاهرة ديال منع الوقوف. واش فعلاً الوقوف ممنوع تما؟ وإذا كان ممنوع، علاش ما كاينش تشوير واضح؟
ثانياً، حنا قدّام قسم المستعجلات، نهار الأحد، وفوقت الناس كتجي فيه مضطرة، ماشي متنزهة ولا خارجة تسارا!
ثالثاً، علاش يتم نقل سيارة للمحجز بلا ما تكون وسيلة واضحة وسريعة باش يعرف صاحبها فين مشات؟ واش خاص المواطن يعيش رعب السرقة، ويضيع 40 دقيقة ديال الاتصالات، باش يعرف مصير ممتلكاتو؟
والأخطر من هاد الشي كامل، تخيلوا معايا:
واحد المواطن جاي من مدينة بعيدة، جاب الأم ديالو أو الأب ديالو للمستعجلات. الطبيب طلب منو ينقل المريض لمستشفى آخر، أو يدير ليه تحاليل مستعجلة. كيخرج يلقى السيارة اختفات!
لا عارف فين مشات، لا عارف كيفاش يتنقل، لا عارف كيفاش يتصرف مع المريض اللي كيتسناه!
واش هادي هي المعاملة اللي خاص يلقاها المواطن وهو أصلاً فواحد من أصعب اللحظات ديالو؟!
أنا ما كنطالبش نكون فوق القانون، وما كنقولش إن المستعجلات خاصها تولّي فضاء للفوضى والوقوف العشوائي. بالعكس، القانون خاصو يتطبق على الجميع.
ولكن كاين فرق كبير بين تطبيق القانون، والتشدد الأعمى في تطبيقه، والتعسف باستعماله.
القانون وُضع باش ينظم حياة الناس ويحمي مصالحهم، ماشي باش يزيد يعقد معاناتهم، خصوصاً فالأماكن اللي كتكون فيها صحة الإنسان وحياته على المحك.
وحتى إلا افترضنا أنني ارتكبت مخالفة، واش ما كاين حتى حل آخر غير جر السيارة للمحجز، وترك صاحبها يتخبط بين الاتصالات والتنقل والانتظار؟
راه المواطن ماشي خصم للإدارة، والسلطة ماشي استعراض للقوة، وتطبيق القانون بلا حكمة ولا مراعاة للظروف الإنسانية كيقدر يتحول من وسيلة لتنظيم الحياة إلى مصدر إضافي لمعاناة الناس.
هادشي اللي وقع ليا اليوم مجرد صفحة من صفحات المعاناة اليومية اللي كيعيشها المواطن المغربي مع بعض الممارسات الإدارية والأمنية، واللي خاصها مراجعة ومحاسبة كلما ثبت فيها تجاوز.
بغينا دولة القانون، نعم… ولكن دولة القانون اللي كتحترم المواطن، ماشي اللي كتخليه يحس بالذل وهو كيقلب على حقه!
نهاية المعاناة على الساعة 20:21
مخالفة التشوير الارضي 150 درهما
الديباناج 200 درهم
المحجز 35 درهم
وحسبي الله ونعم الوكيل
والله يدير الخير فهاد البلاد.
