ريحانة برس
إلا شفتي هاد الرتَل الطويل من سيارات الدولة والمخزن، والإنزال الأمني الكبير، غادي يخيل ليك أن المنطقة كتواجه هجوماً من البوليساريو أو من الجزائر.
ولكن الحقيقة صادمة… كل هاد التعبئة الأمنية ماشي لمواجهة عدو خارجي، وإنما لمواجهة مواطنين مسالمين خرجوا يطالبوا بأبسط حقوقهم المشروعة.
ناس آيت اعبدي، بجبال الأطلس الكبير بإقليم أزيلال، ما طالبوش بالمستحيل، وما طلبوش امتيازات خاصة، كل ما طالبوا به هو الماء الصالح للشرب، وإعدادية وثانوية لأبنائهم، وتعبيد الطرق، وتوفير الكهرباء، وشبكة الاتصالات (الريزو).
واش توفير هاد الحقوق الأساسية ولى تهديداً يستدعي كل هاد الاستنفار الأمني؟ واش المواطن اللي كيحتج على التهميش وغياب أبسط شروط العيش ولى عدواً خاص الدولة تواجهه بكل هاد القوات؟
المواطن ما محتاجش يشوف مواكب سيارات الدولة، محتاج يشوف مشاريع على أرض الواقع. وما محتاجش استعراض القوة، محتاج يشوف قوة الدولة فالتنمية والاستجابة لمطالب الساكنة.
آيت اعبدي ما محتاجاش كل هاد القوات، آيت اعبدي محتاجة الماء والطريق والمدرسة والكهرباء والريزو.
كفى من التعامل مع المطالب الاجتماعية وكأنها تهديد أمني، فالمواطن الذي يطالب بحقوقه ليس عدواً للدولة، بل هو مواطن ينتظر منها أن تقوم بواجبها.
