ريحانة برس – عادل الساهلي
صراحة بقى فيا بزاف هاد السيد. من منصات التتويج إلى السجن.. بطل مغربي سابق تحكم عليه بـ10 سنين حبس نافذ!
صدمة كبيرة فالأوساط الرياضية المغربية، بعدما أصدرت غرفة الجنايات الابتدائية بمحكمة الاستئناف بالرباط حكما بـ10 سنين ديال الحبس النافذ فحق العداء المغربي الدولي السابق عز الدين صديقي، بتهمة القتل العمد.
القضية اللي سالات بهاد الحكم عندها تفاصيل مؤلمة، وبدات ملي اضطر العداء السابق يخدم كسائق مع تطبيق النقل الذكي «إندرايف» (InDrive). صديقي كان نقل واحد الراكب من المحطة الطرقية الجديدة فالرباط فالاتجاه ديال تمارة، ولكن تفاجأ بمجموعة من سائقي الطاكسيات حاصروه، بسبب خدمتو مع التطبيق. وسط داك التوتر والفوضى، وأثناء محاولتو يخرج بالسيارة من المكان، طاح واحد من الأشخاص اللي كانو محاصرينو، وضرب راسو بقوة، وتعرض لنزيف وإصابات خطيرة، قبل ما يفارق الحياة من بعد.
الواقعة خلات المصالح الأمنية تدخل على الخط، وتم توقيف العداء فاليوم الموالي. والتحقيق شمل الاستماع للشهود، ومراجعة كاميرات المراقبة، وإعادة تمثيل الواقعة، والاستعانة بنتائج التشريح الطبي.
ولكن اللي كيخلي هاد القضية مؤثرة أكثر، هو المسار الرياضي ديال عز الدين صديقي، اللي كان واحد من الأسماء البارزة فسباقات 1500 متر فالمغرب خلال التسعينات، وكان من جيل أبطال كبار بحال هشام الكروج. صديقي سبق ليه حقق إنجازات دولية مهمة، من بينها
– ذهبية الألعاب الفرنكوفونية بباريس سنة 1994
– ذهبية الألعاب العسكرية العالمية بروما سنة 1995
– فضية البطولة العربية بالقاهرة سنة 1995
– ذهبية الألعاب العربية ببيروت سنة 1997
من بطل كان كيرفع الراية المغربية فالمحافل الدولية، لواحد الشخص كيقضي اليوم حكما بعشر سنين وراء القضبان
قضية كتطرح بزاف ديال الأسئلة على الصراع بين مهنيي النقل، وعلى خطورة الفوضى والتصعيد، وعلى كيفاش لحظة وحدة تقدر تبدل حياة أكثر من إنسان.
